வீடு வீடாகச் சென்று மாணவர் சேர்க்கை விழிப்புணர்வு

அரசு நலத்திட்டங்கள், சிறப்பு பயிற்சிகள் குறித்து பெற்றோர்களிடம் ஆசிரியர்கள் நேரடி விளக்கம்

தேவகோட்டை, ஜூன் :

சிவகங்கை மாவட்டம் தேவகோட்டையில் செயல்பட்டு வரும் சேர்மன் மாணிக்க வாசகம் நடுநிலைப் பள்ளியில் புதிய கல்வியாண்டிற்கான மாணவர் சேர்க்கையை அதிகரிக்கும் நோக்கில், ஆசிரியர்கள் வீடு வீடாகச் சென்று பெற்றோர்களை நேரில் சந்தித்து விழிப்புணர்வு பிரச்சாரத்தில் ஈடுபட்டனர்.

பள்ளித் தலைமையாசிரியர் லெ. சொக்கலிங்கம் தலைமையில் ஆசிரியர்கள் ஸ்ரீதர், முத்துமீனாள், முத்துலட்சுமி, வள்ளிமயில் உள்ளிட்டோர் பள்ளி சுற்றுவட்டார குடியிருப்புப் பகுதிகள் முழுவதும் சென்று மாணவர்களின் பெற்றோர்களை சந்தித்து அரசுப் பள்ளிகளில் வழங்கப்படும் கல்வி வாய்ப்புகள் மற்றும் நலத்திட்டங்கள் குறித்து விரிவாக எடுத்துரைத்தனர்.

தமிழக அரசு மாணவர்களுக்கு இலவசமாக வழங்கி வரும் பாடப்புத்தகங்கள், நோட்டுப் புத்தகங்கள், சீருடைகள், காலணிகள், பள்ளிப் பைகள், வண்ண பென்சில்கள், ஜியாமெட்ரி பாக்ஸ் உள்ளிட்ட கல்வி உபகரணங்கள் குறித்தும், மாணவர்களின் கல்விச் சுமையை குறைக்கும் வகையில் செயல்படுத்தப்படும் பல்வேறு நலத்திட்டங்கள் குறித்தும் விளக்கம் அளிக்கப்பட்டது.

மேலும், பள்ளியில் கல்வியுடன் இணைந்து மாணவர்களின் தனித்திறன்களை வளர்க்க பல்வேறு சிறப்புப் பயிற்சிகள் வழங்கப்பட்டு வருவதாக ஆசிரியர்கள் தெரிவித்தனர். குறிப்பாக சர்வதேச அளவிலான போட்டிகளுக்கு நடுவர்களாகச் செல்லும் அனுபவம் வாய்ந்த பயிற்சியாளர்களின் மூலம் வாரந்தோறும் இலவச சதுரங்கப் பயிற்சி வழங்கப்படுவதாகவும், மாணவர்களின் கலைத்திறனை மேம்படுத்தும் நோக்கில் இலவச கீபோர்டு இசைப் பயிற்சியும் தொடர்ந்து அளிக்கப்பட்டு வருவதாகவும் பெற்றோர்களிடம் எடுத்துரைக்கப்பட்டது.

பள்ளியின் கல்வி மற்றும் திறன் மேம்பாட்டு நடவடிக்கைகளின் ஒரு பகுதியாக, நாட்டின் பல்வேறு துறைகளில் சாதனை படைத்த ஆளுமைகள் மாணவர்களுடன் கலந்துரையாடிய நிகழ்வுகளும் நினைவுகூரப்பட்டன. இதுவரை 15-க்கும் மேற்பட்ட மாவட்ட ஆட்சியர்கள், உயர்நிலை காவல்துறை அதிகாரிகள், இஸ்ரோ விஞ்ஞானிகள் மயில்சாமி அண்ணாதுரை, கே. சிவன் உள்ளிட்டோர் பள்ளிக்கு நேரில் வருகை தந்து மாணவர்களுடன் கலந்துரையாடி அவர்களுக்கு ஊக்கமளித்துள்ளனர் என்பதை ஆசிரியர்கள் பெற்றோர்களிடம் தெரிவித்தனர்.

மாணவர்களுக்கு புத்தக அறிவோடு மட்டுமல்லாமல் நடைமுறை வாழ்க்கை அனுபவங்களும் கிடைக்க வேண்டும் என்ற நோக்கில் பல்வேறு களப்பயணங்களும் ஏற்பாடு செய்யப்பட்டு வருவதாக கூறப்பட்டது. வங்கி, அஞ்சலகம், பாஸ்போர்ட் அலுவலகம், அரசு தோட்டக்கலைப் பண்ணை, கலை மற்றும் அறிவியல் கல்லூரிகள், காவல் நிலையம், நீதிமன்றம், வானொலி நிலையம் உள்ளிட்ட பல்வேறு இடங்களுக்கு மாணவர்கள் அழைத்துச் செல்லப்பட்டு அங்குள்ள செயல்பாடுகள் குறித்து நேரடி அனுபவம் பெறச் செய்யப்பட்டுள்ளதாக விளக்கினர்.

அதேபோல், மாணவர்களின் கற்றல் திறனை மேம்படுத்தும் புதுமையான கற்பித்தல் முறைகள், அறிவியல் கண்காட்சிகள், விளையாட்டுப் போட்டிகள், கலை நிகழ்ச்சிகள், வாசிப்பு இயக்கங்கள், சுற்றுச்சூழல் விழிப்புணர்வு நிகழ்ச்சிகள் உள்ளிட்ட பல்வேறு செயல்பாடுகளும் பள்ளியில் தொடர்ந்து நடத்தப்பட்டு வருவதாக தெரிவிக்கப்பட்டது.

பள்ளியின் கல்விச் சாதனைகள், தேர்ச்சி விகிதம், மாணவர்களுக்கான பாதுகாப்பான கற்றல் சூழல், சுத்தமான வளாகம், ஆசிரியர்களின் அர்ப்பணிப்பு சேவை உள்ளிட்ட அம்சங்களும் பெற்றோர்களுக்கு விளக்கமாக எடுத்துரைக்கப்பட்டன. அரசுப் பள்ளிகள் இன்று தரமான கல்வியை வழங்குவதோடு மாணவர்களின் முழுமையான வளர்ச்சிக்கும் முக்கியத்துவம் அளித்து வருகின்றன என்பதை ஆசிரியர்கள் வலியுறுத்தினர்.

ஆசிரியர்களின் இந்த நேரடி சந்திப்பு மற்றும் விழிப்புணர்வு முயற்சியை பெற்றோர்கள் பாராட்டியதுடன், அரசுப் பள்ளிகளில் கிடைக்கும் கல்வி வாய்ப்புகள் மற்றும் நலத்திட்டங்கள் குறித்து அறிந்து மாணவர்களை சேர்க்க ஆர்வம் தெரிவித்தனர்.

படவிளக்கம்:
சிவகங்கை மாவட்டம் தேவகோட்டை சேர்மன் மாணிக்க வாசகம் நடுநிலைப் பள்ளி ஆசிரியர்கள், புதிய கல்வியாண்டு மாணவர் சேர்க்கை விழிப்புணர்வு பிரச்சாரத்தின் ஒரு பகுதியாக மாணவர்களின் குடியிருப்புப் பகுதிகளில் வீடு வீடாகச் சென்று பெற்றோர்களை சந்தித்து, அரசுப் பள்ளிகளில் வழங்கப்படும் கல்வி நலத்திட்டங்கள், இலவச கல்வி உபகரணங்கள் மற்றும் பள்ளியின் சிறப்பு அம்சங்கள் குறித்து விளக்கினர்.